-Bok dečki!
-Kaje, ve nejdeš k nam za stol, pa vijdiš kaj smo soumi?
-Idem, idem, samo jo hodim kak spoda, po štengaj, a ne vozim slalom med stoli na terasi.
-Tou kaj nosiš z sobom vu vrečici slobodno deneš na sloboden stolec. Kulko te poznamo sigurno je nekaj zabranjenoga.
-Pak za ve zabranjeno je nej, ali je teško do touga dojti. Moraš meti debele veze.
-Unda nam pokoži kaj i mij vijdimo. Pa policijska stanica je tek prejk pouta, a ovi štiri policajci sedijo dvo stole dale pa nebodo vidli.
-No pogladnite, tou je samo jena majica na šteroj nekaj pijše.
-Čekaj malo pa na njoj pijše USTAŠE U HRVATSKOJ, bodo te pok zaprli ak si jo oblejčeš.
-Vijdi se da si čoravi i kaj nucaš druge dioptrije. Pijše OSTAŠE U HRVATSKOJ.
-Aha, ve vijdim, ali mi je ovo U malo sumnjivo.
-Kaj ti je sumnjivo, bomo ve i slova zabronili.
-Nej sem tak mislil, no v toume U ti je hrvatski grab bez životinjskog carsta na vrhu, a prva kockica je bejle boje.
-Pak je i na Markovoj cirkvi vu Zogrebu prva kockica bejla i kaj ve?
-No, nikaj, sam znom kaj je nekša sotkinja vu Čakovcu jenoga vdrapila z zatvorom kaj je na kapi meo takši grb s natpisom ZA DOMOVINU i tak se špancejro po vatrogasnoj zabavi.
-Tou si pročito, ali ne znoš kaj se tej čovek žalio i kaj je višu soud tou presodo ukinul, a sotkinjo fejst zašpoto kak se nikaj ne razmi vu hrvacko povjest. Pak je i prva službena zastava bila takša. Tuđman jo je kušno dok su je zdizali, a i v cejloj povjesti su bile takše zastave i grbi. To nešterjaj smeta, ali im kuna ne smeta štera je bila samo v NDH.
-Nek ti bou, a kulko vijdim na majici točno pijše OSTAŠE U HRVATSKOJ, a doli je mala napomena da se tou odnosi na one šteri so još nej emigrirali.
-Tak je, treba čitati mala slova, a nej se posle buniti kaj si nej videl, kak si napravio vu banki dok si zdijzo kredit.
-Jo mijslim kaj smo mij šteri smo ostali vu Hrvackoj fejst sumnjivi. Drugi sigurno mijslijo kaj smo se dosti nakrali pa nam ve penezi već ne trebajo, a penzije niti ne zdijžemo. Buš vidil za dvej leti dok nam se pridružiš kaj bodo o tebi povejdali, no dobro je kaj si naš pripravnik pa te bomo vu se uputili.
-A zakaj ste vij nej na moru? Pa Središće je na pol prozno.
-Je, nojbole još i tou. Kaj bi tek unda o nami tračali mada je sejedno jer ve velijo kaj samo glumimo kaj nejmamo za more i kaj z tejm nebremo nikoga fkaniti.
-Pa vij niti ne znote kakša vam je penzija?
-Dobro mij znoumo, ali Manolić ne zno. Un ih dobiva štiri, pet, od une partizanske pa nadale.
-Stvarno, pa kulko mij samo pločamo takše penzije kaj dobivaju partizani i domobrani šterih već nej. No, zatou imaju vnuke i pravnuke pa nejga problema. A kaj se tiče Manolića on bi jedijni trebo dobivati partizansko penzijo jer je jedijni još živ. Pa vu stotoj leti se tek oženil, pok. Jeni velijo kaj ima i odlikovanje od krapinskog pračovjeka, a drugi kaj je bil slepi putnik vu Nojinoj arki.
-Pustite ve njega, zno morti ko od vas kaj se tou otpira tu prejk ceste?
-Tou bo ti jen advokat mel svojo kancelarijo. Pameten dečko jer zno kaj bodo se ve sij Središćonci poprejk med sobom tožili. Ve im je bijzu jer vu Čakovec so baš nej šteli iti.
-Meni je več čuda njih reklo kaj me bodo tužili, do ve so nej, no ve me tou zabrinjava.
-Kaj se bojijš, znoš šteri so tou pa dijdi prije njijh i odma podnesi protivtožbo, tak kaj njihova tožba neu mejla smisla.
-Vijš ti tou, neje bedasto kaj velijš, bom se odma čim otpre zapijso. Ne velij se zabadav da denes saka informacija zlota vredij.
-Je dečki jo moram iti. Več je polne pa kaj me žena nej tužila, a vij kak očete.
-Samo idi, dober je stroh, a mij bomo još samo malo ostali, jeno por rundi. Vijdimo se zutra.
(R. Tomanić, foto: rt, ilustracija)