Dok se je predi otprilike tri tjeden javil negdašnji varaždinski župan Radimir Čačić i skresal nam Međimorcaj kak on zna što bode naš novi župan smo se mo počeli norca delati kak bi on mogel to znati. Unda je on rekel, a novinari so napisali kak mi Međimorci ne bodemo meli župana nego županico i to dofčerašjo zamjenico župana Posavca, a denešjo državno tajnico v ministarstvo turizma beličanko Sandro Hermanovo. I neje čuda vode preteklo spod pod mostom na Trnavi i Sandra se je prijavila za županico.
Pitam vas pitam kak je gospon Čačić znal da se Sandra kani javiti za županico, a ona je to željo skrivala globoko vu svojemo srčeko. On z Varaždina, kaj nam rekel Zagorja je znal, a mi Međimorci smo ne meli pojma. Ve sam se zmislil kak je on to novinarima rekel v Nedeliščo, ali ne verjem da so to ovi nedelski političari znali. Kak bilo da bilo sosed Čačić je pak par koraki napre pred nami Međimorci. Ve je zišlo na svetlo dneva ne sam to kaj se je Sandra prijavila za županico kak je gospon Čačić rekel nek je dobila vetra v hrbet od međimorskih SDP-eovcov, a jiv međimorski šef je z Nedelišča. Kak bilo da bilo mi bodemo Sandro zebrali zato kaj je vredo, a ne zato kaj nam jo je Čačić predložil.
Kuliko vidimo gospon Čačić je nekaj znal ili pak još navek zna kaj smo mi Međimorci ne znali? Brzčas? Sejeno si nekaj gruntam kak more Čačić znati što bode naš međimorski župan ili županica, a neje znal što bode jiv varaždinski župan. More biti da je točno to ak je čovek dale da unda čuda bole vidi. Čačić je zgubil izbore pre svoji hiži, pak ve oče „pomoči“ nam Međimorcaj kaj si zberemo županico. Čačića več pamtim kak političara duže od dvajsti let i navek je jako rado gledal prek Drave k nam v Međimorje. Nekaj ga sploh v Međimorje vleče. Ili smo mi Međimorci bolši od Varaždincov i Zagorcov? Ili pak imamo bolše vino, bolše meso z tiblice, bolše koščično olje, bolše gibanice i pogače?
Kaj reči za žene v politiki? Čakovčanci imajo gradonačelnico i zamjenico, ovi v Orehovici imajo načelnico , a i mještani Donjega Vidovca so si mesto načelnika zebrali načelnico. Kuliko vidimo žene pomalem jemlejo cugle vlasti vu svoje preštimane roke. Jakše so nek smo si mi moški gruntali. Nejpredi so držale tri vogle v hiži, a ve več hajdi let držijo se štiri. Se glavne odluke pre hiži se donašajo jednoglasno, onak je kak žena veli.
Negda smo mi moški bili glavni na divano ili pak kaučo z daljinskim za telkač v roki, a denes se gledijo sam one serije i emisije štere prejdejo ženino cenzuro, kaj bi se reklo veži konja tam de gazda veli. Tu i tam se gledi labodoritanje dok žena ima drugoga posla ili pak reprize utakmici dok odide spat. Se vejčpot morete videti nas moške v kuhji kak se motamo okoli šporhota i frižidera, a pralo i sudoper so nam saki den na raspolaganjo. Več par let mi moški se prepravlamo kaj se bodemo počeli boriti za ravnopravnost v hižama, ali smo brzčas i tu več zakesnili. Ak smo ne na vreme genoli nesmo mogli niti na vreme dojti na cuk šteri pela v bolše i ravnopravnopravneše zutra. A zmislite se sam kak so žene stiha došle v politiko? Stiha, stiha so se sam malo naluknule, a ostale so zanavek ili pak dok de ne zavolijo. Nekaj si gruntam da mi moški, kaj se politike dotikavle, moremo hititi puške v kuruzo i reči zbogom. Zato bodete vidli se vejč i vejč nas moških kak španceramo pese po vulicaj i parkaj, a za to vreme nam žene doma ili pak pre sosedo krojijo politiko.
Pišta B.
(foto: Pavo Jazvić)
