Več sam se dosti dugo ravnal kaj napišem nekaj o tomo kaj smo mi Međimorci dobili, a kaj smo zgubili z temaj zadjaj izboraj za našega međimorskoga župana. Pak bodem ve, pak sam ne, pak bodem zutra i pak sam ne i furt sam si nekaj grruntal da imam dosti časa jerbo dok je Sandrina slika na HDZ-eovoj hiži do unda je ne prekesno.
Kaj vam nek rečem, otkod god gledim bili so to nekši čudni izbori i minuli so nekak preveč stiha. Istina Božek bili so štiri kandidatlini, ali se je minulo nekak preveč stiha. Nejglasneši je bil Darkec Zverov, ali sam tak dugo dok se je ne javil Matija Posavcov. Ne bodem rekel da je ruon tak bilo, ali dok je Matija donesel svojo kandidaturo Sandra, Mladen, pak i Darkec so hitili izborne puške v kuruzo. Mortik je to ne ruon tak bilo, ali meni je to tak nekak zgledalo. Štiri kandidatlini so bili, a sa biračka mesta so se otprla kak za prave redovne izbore. Birački odbori so čakali a glasači so čvapkali kak kaplice dežđa z strehe z parme dok dežđ ne curi nek sprežđi. Trebali so birački odborniki deliti žganičko ili pak kojeka onima šteri so došli unda bi jiv hajdi vejč došlo.
Izbori so pokazali da je SDP-e nejvekša kaj nem rekel nejjakša stranjka. Oni so navijali i dali potporo sim kandidatlinima. Za nešterne so priznali, a za one druge so to napraji skrivečki. Restepli so se z potporaj od Sandre (joj so svoje glase dali moški), prek Mladena do Darkija, a oni šteri so skrivečki davali svoje glase so zacajhnuli Matijo. A esdepeovcov ga se skupa cirka jezero ak prebrojimo i one šteri so ne platili članarino več tri leti. Najbrž so oni to jako spametno naprajli jerbo je jiv kandidatlin, na se zadje, ipak pobedil.
Kaj se penzionerov i jive stranjke dotikavle tu ga ne nikaj novoga jerbo penzioneri so navek na strani pobjednika. Ve so ne mogli prejti na strano pobjednika posle izborov nek so to morali naprajti predi izborov. I prešli so, sam ne znati što jim je rekel da bode Matija pobedil. Jiv šef je lepo rekel: pak je to bilo jasno kak den. Nesam znal da imamo tak spametne penzionere, a da oni tak spametnoga šefa. Ve vidite kak so naši penzioneri spametni dok jim penzije redovito dohajajo.
Morem vam reči da mi se to nikak ne vidi kak so to HDZ-eovci naprajli. Oni so naprajli se sam ne pošteno. Nejpredi so med sobom ne mogli najti svojega kandidatlina, več ga dugo iščejo, a oni so nejvekša i nejjakša stranka v Međimorjo i v Lepoj Našoj. Tak se bar falijo. Meli so jenoga kandidatlina, ali so ga uhljebili v državno poduzeče pak ga je županova fotelja ne preveč privlekla, kak je rekel: bole državna fotelja vu roki nek županova na kiti. Predi izborov so obečali sebi i Božeko da bodo svoje glase dali fajnoj Sandri i da bi pokazali kak mislijo ozbiljno so jeno veliko (đambo) sliko deli na svojo stranačko hižo. To so zbavili kak Božek zapoveda tak da so si znali za koga oni, Darko i družina, drukajo, ali so v nedelo pozabili dojti glase davat.
Zebrani je novi – stari župan, Matija Posavcov, tak da so te izbori pokazali da je do izborov niti ne trelo dojti. Narod je zebral po srco oliti kak se to veli, glas naroda je odlučil kaj god to značilo.
Kaj smo mi Međimorci dobili z tem novim izborima? Nikaj! Župana šteroga smo meli znova je župan! A oni šteri so ga natirali kaj podnese ostavko se i dale skrivlejo. Ne znati kaj je ve z temi deset jezerač kuni, o šterima se več duže od tri mesece spominamo? Je li so još pre Matiji ili pak so završil vu kasi jegove stranjke? Ili jiv je mortik vrnul v Draškovce? Ne znati, ali ono kaj znamo je katastrofa, rekli bi stari ljudi: srepali so se bregi, a skopecnul se je miš. Za deset jezerač kuni so se održali novi izbori šteri so koštali cirka dva milijone kuni. Da čovek ne povjeruje. Ali se je, kak zgledi, prinas tak, oni šteri so zakuhali te nove izbore oni so jiv ne platili, a mi šteri smo ne nucali nove izbore smo morali globoko porinuti roko v žep i vum cuknuti dva milijone kuni štere nemamo. Kaj bi rekli prinas nikaj novoga, jeni te isti još navek vedrijo i oblačijo i to oni šteri so bliže političkomo vrho, a mi doli, mi mali ljudi i dale plačamo! Otkod malim ljudima tuliko penez kaj morejo poplatiti se kaj ovi višeši zakuhajo oliti zaprdnejo?
Pišta B.