Kraj sakoga leta je cajt kaj se podvlečejo računi kaj smo naprajli minulo leto, kaj smo planerali, a ne smo naprajli kaj bi rekel de smo zahuzali. Naš Sabor, a i saborniki so završili svojega posla za ovo leto i odišli na urlab šteri bode trajal leto dni, počel je v decembro ovoga 2021, a završil bode v januaro novoga 2022. leta. Čim je Sabor završil svoje mam smo zazvedili za sakoga sabornika kuliko je delal, kuliko pot se javljal za reč, kaj je spituval i kak je redovito dohajal v Sabor na posel. Vum je došlo za se sabornike kuliko so delali, kuliko so lenguzali oliti dremali, pak tak i za naše međimorske. Zazvedili smo da se je nejvečpot javljala za reč i da je nejveč toga spituvala Boška Ban Vlahek, a da se je minulo leto niti jempot ne za reč javil naš i esdepeov sabornik Štef Kovačov.
Leto je minulo, a Štef se je niti jempot ne ftegnul javiti za reč, niti jempo je ne nikaj pital, nikaj nucal, nikaj iskal i kak bode unda nekaj zvlekel za Međimorje naše malo. Kak bode dobil ako niti ne pita? Niti Marica ne da ak jo ne prosiš! Daj je bar pital kak negdašji naši saborniki; prosim vas lepo je li slobodno otprem obloka na sabornici malo je teški zrak ili zapral bi obloka jerbo je preveč friško. Nikaj pod milim bogom je ne pital jerbo mo je se bilo prav ili pak sejeno.
A zakaj mo je bilo prav? Zato kaj je jako retko dohajal v sabornico. Otkak mo se Uskok pomogel kaj so se posošile predizborne suze na jegovomo lico Štef se je ne več niti jempot pojavil v Saboro. Nebrem veruvati da dok čovek kak je Štef zgubi jedno utakmico več ne igra dale? Da bi se tak ponašal Hajduk i hajdukovci oni več jeno par let ne bi meli svojega kluba. Ak ove par zadji meseci denemo fkrej probajte se zmisliti da je Hajduk nekoga zadji pot pobedil? No, pustimo Hajduka na miro i idemo mi nazaj na našega Štefa sabornika: kak smo rekli posle spominka z Uskokom več je ne dohajal v Sabor, a to je več štiri mesece. Čim se je to zazvedilo bil sam najgerek je li je dobavlal plačo za to kaj je ne delal? Koga god sam za plačo pital smejal se z mene i nazaj me pital: a zakaj nej dobival plačo, pak on je zebrani za sabornika i za to ga mi plačamo, a dok je prisegel za sabornika nišči mo je ne rekel kaj bi moral nekaj i delati? Imajo oni praf, pak mora čovek od nečega živeti i to dobro živeti. Još me nekaj gvinta, je li mortik Štef odhaja od hiže, odhaja i v Zagreb sam mo se nejde na posel tak kaj more dobiti i putne stroške, a i peneze za odvojeno živleje. Dok se se to skup nameče unda se tu naberejo lepi penezi, pak je unda niti ne čudno kaj živi kak bubreg v lojo makar nikaj ne dela.
Kaj reči, neje demokracija za se, a i mi bi morali bar malo pregruntati dok čoveka zbiramo kaj nas bode predstavljal v Saboro. Mi smo ga zebrali, jemo dobro, a što pita kaj nas kak biračko telo? Nišči! Nas se pita sake dve ili pak štiri leti znova, a dok mandati trajejo i dok državni penezi tečejo v žepe zebranih nas opče ne nucajo i čistam lepo živijo brez nas. Dok bodo znova izbori pak se bode malo resplakal, bode nam se premilil i pak ga bodemo znova zebrali. Kaj ga bodemo mejali, pak on je tak fajni i tak se lepo smeje?
A kaj bode hodal ak nikaj ne pita i nikaj ne nuca? Bar prešpara potne stroške i gablece i obede v saborskomo restorano po tri ili pak pet kuni. A zna se kak glasa davle, navek je kontra sega kaj se predlaže makar navek niti ne zna zakaj. Skorom sam pozabil, pak more glase davati oliti pošiljati on-line ak so mo uskoki vrnoli kompjutera.
Pišta B.