Štovane čitateljke i čitatelji ! Nojprije mi dozvolite da vam se predstovim. Jo sem Iva Kopriva i već sademdeset lejt živijm v Središću. V svojem sem se životu čuda touga nagledala i još već touga dožijvela. Ipak sem svoje mišlenje navek mejla, makar me je za njega niko nigdor nej pijto se do ve kad me je Muralist zaprosio da nekaj za njega napijšem. Velijo kaj bi tou bilo nekše dnevno izvješće iliti kak bi naši pajdoši englejzi rakli Day Report.
Stora sem puca v lejtaj pak imam dosta časa čitati novine i gledati televiziju i po toum pitanju sem dobro informirana. V zodnje vreme sij govorijo o nekšemu Neimaru. Prvo sem mislila kaj je to firma z Središća, una kaj nekaj zijđe i delij nekše certifikate, no bilo mi je malo sumnjivo kaj bi oni delali v Brazilu. Včasi sem povezala kounce i skužila kaj se tak zove nekši labodoritač na svetskom prvenstvu vu nogometu. Jedino mi je nej jasno zakaj se vozi v kolijcima, a ne igra za naše vatrene šteri su na tou ideju prvi dojšli pa se ve lejpo sončajo na Jadranu. Goli, se razme !
Dok so bile one poplave i jo sem štela dati svoj doprinos. Donesla sem na autobusnu jeno storo, ali ispravno vodovodno cejv štero mi je Lipićka nej štela zeti. Sa sreća kaj je takša počila Milanoviću pa sem jo njemo poslola.
Sij međimurski mediji pijšejo o Čačiću kak da se vrno z Oksforda, a nej z zatvora. Oče se po redu reformirati, ali mene nebre. Preveć sem jo reformi mejla v životu i ve dok dobim penzijo morem se samo na cestu polegnuti i Boga moliti kaj Čačiću vrnejo vozačko.
Našega je župana Matiju Pusićka kooptirala v precedništvo stranke. Tak je i Kosorica Karamarkoja pak ve doma dejla krompejrovu šalotu. Gospođa Pusić sigurno nazna kuhati, ali bo se pored Posavca navčijla i Jadranki društvo delala.
Danes je bilo joko vrouče. Sij povejdaju kaj bo zutra dešč i fejst bo grmelo. Jedijno je Vakula suzdržan kak oporba v našemu Gradskome vejću. Jo prognoze ne poslušam jer po svojim kostima se znam. Kaj se touga tiče bole da pijtaju mene nek nekše delfine, deve, kornjače, magarce i ostale političare.
Sem nekaj načula kaj se naš precednik Josipović igra s barbikami bez obzira kaj je moški i kaj mu lejta ne falijo. No kak so denes v trendo dugine boje nikaj me ne čudi. Saki ima pravico na svoju seksualnu orjentacijo.
Već smo leto dni v Europskoj uniji i ve si oni kaj su nas prijeli glovo tučejo. Se povejda kaj nam je država v bankrotu i kaj bo Europa dejla šapu na našu balagajno. Zatou Pusićka veli kaj Srbiji nemo bronili ulaska niti im postovljali nekše zahtjeve. I tu ima prav. Zakaj bi jijm bilo bojše neg je nam ?
Ak ne vmerjem do zutra, pok vam nekaj napišem. Vaša Iva Kopriva.